فارس بلا مأوى بقلم ولاء رفعت ج1

_ يعني آنسة ندي، أصدي مدام ندي مقدمتش شغلها، ممكن أعرف السبب؟.

شحب وجهها من كلماته المصاحبه بأنفاسه التي شعرت بها، كما تخللت أنفها رائحة عطره المحفورة بداخل ذاكرتها منذ سنوات، قالت بدون تلتفت إليه:

_ ما أنا كنت لسه هقول لحضرتك إن هقدم الفايل الصبح عشان ملحقتش أخلص، كان سيستم الجهاز بتاعي واقع وأستنيت مهندس البرمجة وصلحو الصبح.

رفع زواية فمه بتهكم ألتمسته من كلماته برغم إنها لاتنظر إليه:

_ و ليه مكملتيش علي أي جهاز تاني، ولا مش لاقيه أي حجه تقوليها! .

وهنا لم تتحمل سخريته وكل زملائها ينظرون ويستمعون إليهما، نهضت وأستدارت و رفعت وجهها له حيث فارق الطول بينهما فقمة رأسها تصل إلي منتصف عضده فهي كالعصفور أمامه.

_ مكملتش علي كمبيوتر تاني، عشان كل شغلي مسيڤاه علي جهازي الي بشتغل عليه، وكمان دي أول مرة تحصل معايا يعني مبتحججش زي مابتقول.

تراجع إلي الوراء ويصفق بيديه قائلاً :

_ براڤو عليكي.

فقام بمناداة السكرتيرة:

_ آنسه مايسه؟.

وقفت قائلة:

_ نعم مستر علي.

حدج ندي بتوعد فقال:

_ يومين جزا لمدام ندي عشان تتعلم تتكلم بعد كده مع مديرها بإحترام.

_ أمرك يا فندم.

أشار بيده للموظفين قائلاً :

_ الإجتماع خلص، إنصراف.

غادر الجميع وما زالت تقف تنظر له بذهول فقالت بصوت مرتفع وحاد :

_ علي فكرة ده يبقي ظلم وإفترا وأنا مش هقبل بيه.

أشار علي للسكرتيرة بأن تغادر:

_ روحي أنتي يا مايسه علي مكتبك وأقفلي الباب وراكي.

وبعد أن غادرت الأخري، أقترب من ندي و بنبرة فحيح قال:

_ أول وأخر مرة صوتك يعلي عليا لأن لو أتكررت مضمنش ردة فعلي وقتها عليكي، وبعدين أنا عمري ما كنت ظالم ولا مفتري يا مدام وأنتي أكتر واحدة عارفة كده ولا نسيتي؟.

أبتلعت لعابها وأرتسمت القوة علي ملامحها و وقفت بشموخ:

_ لو فاكر إنك جاي الشركة عشان تنتقم مني يا علي يا حسيني يبقي أنت غبي أوي.

أمسكها من زراعها ودفعها نحو الحائط ليحاوطها بجسده، تفوه من بين أسنانه بحنق:

_ أتكلمي بإحترام أحسن لك يا ندي، ولا لسه فكراني علي الأهبل بتاع زمان، ها؟، وأيوه أنا جاي مخصوص بس عشان مش أنتقم منك وبس، ده أنا زي ما عيشتك أجمل أيام حياتك زي ما كنتي بتقوليلي وقتها، هخليكي تعيشي أسود أيام حياتك، هخليكي تبوسي إيدي عشان أرحمك.

_ أنت شكلك أتجننت ونسيت أني متجوزة، وجوزي يبقي مين.