فارس بلا مأوى بقلم ولاء رفعت ج1

_ لاء يا ندا، مش أنا العبيط الي يتضحك عليه بالأكل، لازم أعلمك قبل ما تنطقي أي كلمة تفكري فيها ألف مرة.

طرق علي الباب، فقال:

_ أتفضل.

دلف العامل يحمل صينية مستديرة يعلوها فنجان قهوة وكوب ماء، وضعها فوق المكتب قائلاً:

_ أتفضل يا أكرم باشا.

_ تسلم يا عم جادالله.

_ العفو يا باشا، آه صح قبل ما أنسي طارق باشا عايز حضرتك تعدي عليه قبل ما تمشي، أي أوامر يا باشا.

_ شكراً يا عم جادالله، أتفضل أنت.

_ وبعدما أنتهي من إرتشاف قهوته، ترك القدح علي المكتب ونهض، يمسك بسلاحه يضعه في جراب جلدي متعلق بحزام يلتف علي زراعه أسفل سترته.

غادر الغرفة متجهاً إلي غرفة معلق علي بابها « المقدم /طارق المنسي»، طرق الباب ثم ولج إلي الداخل، فوجده بإنتظاره:

_ أتفضل يا سيادة الرائد.

جلس أمام مكتبه بجدية وقال:

_ بلغني إن حضرتك كنت عايزني.

أمسك بملف ورقي قائلاً :

_ عايزك في موضوع مش عارف يمكن ليه علاقة بسليم العقبي.

أعتدل في جلسته ينظر إلي الملف الذي قام المقدم طارق بفتحه علي صور فوتوغرافية لجثة مجهولة مشوهة بشكل لا تتحمل النظر إليه، حدق أكرم في الصور ب ردة فعل طبيعية فهو معتاد علي تلك الجرائم البشعة.

فقال ويتفحص تشوهات الجثة بالصورة:

_ واضح جداً إن القاتل مستخدم أدوات جراحية لسلخ الضحية ومن شكل وش الجثة برغم التشوهات الفظيعة فيها كأنه بيصرخ ده دليل إنه كان بيتسلخ وهو حي، هي الجثة متحفظ عليها في أنهي مشرحة؟.

أجاب الآخر بنظرات إستفهام وقال:

_ مش هينفع تروح.

_ ليه يعني؟ .

_ عشان التحقيق في القضية دي إختصاص ياسر مدكور.

تجهم وجه أكرم، فزفر بضيق وقال بتهكم:

_ وطبعاً هيأيد القضية ضد مجهول زي الخمس قضايا الي فاتو وكلهم كانو بنفس النمط جثة يا صاحبها مسلوخ وهو هي يا إما محروق يا إما بقايا جثة متحلله في حمض وكلهم سبحان الله الي قتلهم مجهول.

_ أهدي يا أكرم ومتخلنيش أندم إني قولتلك علي حاجة، و عايزك تاخد بالك ومتخبطش في ياسر علي الأقل عشان تلحق الترقية الجديده ومتلاقيش الي يقف لك فيها.

تنهد وأخذ يستغفر ربه، وقال:

_ يعني عاجبك الي بيحصل؟.

_ لاء مش عاجبني أومال أنا ببلغك بأي جديد ليه، أنا عايزك تهدي وتفكر بالعقل وبلاش التهور الي يودي في داهية، أنا وأنت عارفين كويس إن ياسر ليه ناس تقال أوي في وسط رجال الأعمال والسياسة ليهم كلمة في الداخلية، وياما جرايم حصلت وهو كان مكلف بالقبض علي الجاني فيها وفجاءة نلاقيها يا أتقفل ملفها يا إما قيدت ضد مجهول ولا ناسي قضية الرحاب الي من تلات سنين بتاعت العيلة الي لاقوهم كلهم مقتولين وجثثهم متحلله وتم التعتيم عليها في الإعلام والصحف والمجلات، وأتقفل ملف التحقيق فيها.