وصفة صفية بقلم منال ام ابراهيم مرجان ج1
– وبعدين يا عزت…إيه اللي حصل
– صفوت قعد مع فردوس تلت شهور وبعدها عم صبحي مات …وتاني يوم وفاته أبويا عرف بموضوع الجواز ده من عامل عندنا في المعرض …كان صاحب عم صبحي وهو الوحيد اللي عم صبحي اداله عنوانه الجديد…ولما راح عشان يحضر العزا شاف صفوت أخويا وهو واقف ياخد العزا وسأل الجيران وعرف انه يبقى جوز بنته…جري بعدها على أبويا وبلغه
– وعمي الله يرحمه عمل إيه لما عرف?
– للأسف كدب عليهم هما الاتنين وفرقهم عن بعض .
-كدب عليهم!
– ايوه يا سمية…أبويا تاني يوم راح العنوان اللي اداهوله العامل ده…وكدب على فردوس وقالها ان صفوت هو اللي باعته وإنه وافق يطلقها بعد ما هدده إنه يتبرى منه ويحرمه من الميراث…والمسكينة صدقته لأن اليوم اللي قبله يوم وفاة أبوها صفوت قالها إنه حيصارح ابويا بموضوع جوازهم عشان مابقاش ينفع انها تعيش بعيد لوحدها وعشان يجيبها تعيش معانا هنا في بيت العيلة …فهمت ان صفوت كلمه واداله العنوان كمان …بعدها ابويا طلب منها تلم هدومها وتمشي وقالها إنه مش عايز يشوف وشها في دمياط كلها…وهيا اصلا بعد وفاة أبوها مابقاش ليها حد في دمياط تستنى عشانه …لمت هدومها وطلعت على القاهرة وراحت عاشت هناك عند واحدة قريبة أمها …وبعد ما مشيت اكتشفت انها حامل في نادية
– طيب وعمي بقى كدب على صفوت ازاي
– فهمه ان فردوس لما راحلها اخد ت منه فلوس عشان توافق تبعد عن صفوت …وان ده كان كل هدفها من جوازها من صفوت …لكن صفوت ماكانش مصدق …دور عليها كتير عشان يعرف الحقيقة منها …الحقيقة اللي أبويا الله يرحمه صارحه بيها وهو بيم*وت وطلب منه يدور على فردوس ويرجعها ويطلب منها انها تسامحه…وطبعا في خلال الفترة دي كان اتجوز صفية وخلف نورا…والنهاردة بس الست قريبة فردوس اللي كانت قاعدة عندها اتصلت بيه وادته عنوان المستشفى اللي فردوس كانت فيها …صفوت جري على هناك…ولما راح عرف ان فردوس كان عندها اللهم احفظنا مرض خبيث وانها ما اكتشفتش ده غير في مراحل متأخرة …وانها اتصلت بيه عشان تسلمه نادية لأن دلوقتي مابقاش ليها حد غيره…وماتت بين إيديه بعد ما وصته عليها…ما تتصوريش حالته صعبة ازاي يا سمية…أنا اكتر واحدد حاسس بيه لإني عارف هو كان بيحبها اد إيه
