وصفة صفية بقلم منال ام ابراهيم مرجان ج1
هز علي رأسه نافيا ثم قال بجدية:
– لا يا أحمد…أنا كنت عايز اقعد اتكلم معاك شوية لو ماكنتش انت عايز تنام
– لا اطمن…أنا عادة مش بأنام بعد صلاة الفجر …تعالى نقعد ونتكلم عشان أنا كمان عايز اتكلم معاك لأن بصراحة شكلك مش مريحني من ساعة ما جيت .
اتجه علي واحمد إلى احد الطاولات الموجودة بالحديقة ثم جلسا معا امامها …نظر احمد إلى علي نظرة مطولة محاولا فيها سبر أغواره وإستشفاف ما بداخله …ثم قال بجدية:
– ادينا قعدنا يا سيدي…مالك بقى فيك إيه يا صاحبي…إيه اللي مضايقك بالظبط? أنا مارضتش اضغط عليك من ساعة ما جيت ولا اسألك فيه إيه…قولي بقى…هيا لسه طنط سمية بتضغط عليك عشان موضوع نورا?
– هيا مش مسألة بتضغط عليا يا أحمد…اللي تاعبني إني عارف هيا نفسها إني اتجوز نورهان اد إيه وأنا مش قادر احققلها الرغبة دي …مش ذنبي ان أختها وصتها بكده…ومش ذنبي كمان إني بحب نادية
– ماهي معذورة برضه يا علي…ثم انت كمان عليك حاجات غريبة… ازاي تبقى ادامك واحدة زي نورا وتفكر تبص لواحدة زي نادية
– سبحان الله…انت بتردد نفس كلام أمي وإخواتي بالظبط…انتوا بتقعدوا مع بعض من ورايا…وبعدين يا أخويا لما هيا عجباك اوي كده ماتتجوزها انت وتحل المشكلة دي
– كان على عيني يا ابن خالي…صدقني أنا لو ماكنتش مشغول بغيرها كنت فكرت فيها علطول
– يا ابن الإيه…بقى انت بتحب من ورايا …وعاملي محترم ومالكش في الحاجات دي
– هو أنا قلت إني ماشي مع غيرها ولا حاجة…أنا قلت مشغول بغيرها…يعني بفكر في غيرها…مستريح لغيرها …حاطط عيني على غيرها…ولا بلاش حاطط عيني دي عشان أنا لما بشوفها بغض بصري والله
– وأنا اللي كنت فاكر نفسي صاحبك وأول واحد حيعرف بحاجة زي دي…بس تطلع مين دي…أنا اعرفها يعني?
– صدقني يا علي…لما ييجي وقته لازم حتكون انت أول واحد تعرف …خلينا فيك انت دلوقتي
– شوف يا احمد…أنا مش حانكر ان فيه حاجات كتير في تصرفات نادية مش عجباني… ومش حانكر كمان ان الحاجات دي كلها تقريبا عكسها موجود في نورهان… لكن أنا عندي أمل اننا لما نتجوز إن شاءالله حاقدر أغير الحاجات اللي مش عجباني دي …بص بإختصار كده…أنا عايز اتجوز نادية بس بمواصفات نورهان…فهمت حاجة?
