وصفة صفية بقلم منال ام ابراهيم مرجان ج1

– لبنى: رغم ان كان عندي 16 سنة انا ونورا لما جينا هنا…لكن ماكنتش قادرة استوعب احنا ليه بنسيب بلدنا … لكن عموما احنا خلاص اتعودنا على العيشة هنا واتأقلمنا معاها

غمزتها نورا قائلة بمكر:
– بس بيتهيألي ان لو جاتلنا فرصة نرجع دمياط تاني مش حنقول لأ…ولا انتي رأيك إيه يا لبنى?

احمرت وجنتاها وهي تجيبها قائلة بغيظ مكتوم: نورا أنا باقول تروحي تروحي احسنلك …مش كده برضه?

– معاكي حق …أنا يادوب كده الحق اروح قبل بابا مايرجع من الشركة

-سمية: طيب استني يا حبيبتي لما تاكلي لقمة معانا

– بالهنا والشفا انتوا يا حبيبتي…يلا سلام

مساء يوم الخميس كانت سمية جالسة مع بناتها أمام شاشة التلفاز عندما خرج علي من غرفته وهو يرتدي ملابس الخروج إستعدادا للذهاب إلى حفل عيدميلاد نادية..اقترب علي من والدته وجلس إلى جوارها قائلا بتلعثم:
– ماما لو سمحتي كنت عايز أقولك على حاجة بس أرجوكي مش عايزك تزعلي مني .

شعرت سمية بالقلق من حديث علي فقالت بجدية:
– قولي يا حبيبي …انت عارف ان عمري ما ازعل منك ابدا

– أصل أنا قررت إني اطلب إيد نادية من عمي النهاردة في عيدميلادها

تجهم وجهها فجأة وشعرت وكأن دلوا من الماء البارد قد سكب فوق رأسها…بدت كطفل صغير مازال يتعلم الكلام وهي تجيبه قائلة:
– يعني مصمم برضه يا علي على اللي فدماغك.

تحدثت لبنى قائلة بضيق:
– خلاص يا ماما سيبيه على راحته…احنا حذرناه وهو حر

– علي بإنفعال: مالها نادية بقى ان شاءالله عشان تحذروني منها? ولا عشان مش حتجوز اللي على هواكم يبقى خلاص

– والله ماعشان كده يا ابني… صدقني يا ابني والله نادية ماتنفعك

– يا ماما كفاية كده بقى…أنا اجلت الخطوة دي كتير اوي عشان خاطركوا…أنا عندي 28 سنة يعني مابقتش صغير…أنا مسئول عن قراري ومستعد اتحمل نتايجه كويس.

لم تجد سمية جدوي من الرفض…فقد حسم علي قراره ولم يعد هناك طائل من وراء هذه المناقشة فقالت بإستسلام:
– اللي تشوفه يا ابني…أنا أهم حاجة عندي هيا سعادتك…ومادمت انت شايف ان سعادتك مع نادية يبقى خلاص…مبروك يا حبيبي

انفرجت أسارير علي وافتر ثغره عن إبتسامة عذبة فامسك بيد والدته يقبلها قائلا بفرحة
– ربنا مايحرمنيش منك ابدا يا ست الكل….انا كنت واثق ان سعادتي اهم عندك من أي حاجة تانية …أنا ماشي بقى رايح لعمي…مافيش حد ناوي ييجي معايا