وصفة صفية بقلم منال ام ابراهيم مرجان ج1

أشرقت شمس اليوم التالي على منزل حامد الدمياطي بمن فيه…استيقظ الجميع وتناولوا إفطارهم واستعد وا للمغادرة…وبعد قليل كانوا يقفون في حديقة الفيلا إستعدادا لركوب سياراتهم والإنطلاق إلى القاهرة …انتهى الجميع من السلام على بعضهم البعض وقام صفوت بدعوتهم جميعا لحفل عيدميلاد نادية الخميس المقبل…وبالطبع وجدتها ألفت فرصة سانحة لكي يذهب ادهم ويعيد الكرة مع نورا مرة أخرى…فيما اعتذر أحمد عن الذهاب لرفضه حضور مثل هذه المناسبات…واخيرا التفت صفوت إلى علي قائلا:
– يلا بينا يا علي…اعمل حسابك توصل والدتك وإخواتك وتحصلني على الشركة ورانا شغل كتير

– علي بإذعان: تحت أمر حضرتك يا عمي

ثم التفت إلي نورا قائلا:
– اعملي حسابك تأخدي أختك معاكي فعربيتك عشان أنا حاطلع على الشركة علطول

– حاضر يا بابا

اقتربت منها نادية قائلة:
– بس اعملي حسابك أنا اللي حاسوق

– بس على شرط …تسوقي بالراحة وتبطلي سواقتك المجنونة دي

– يا بنتي انتي حتفضلي جبانة كده طول عمرك…اكبري بقى

– لا يا ستي…مين قالك إني عايزة اكبر…أنا مرتاحة كده

– صفوت: يلا بينا…مش حنضيع الوقت فلعب العيال ده

وبالفعل ركب الجميع سياراتهم وانطلقوا في طريقهم إلى القاهرة

عادت نورا إلى منزل عمها بعد أن قامت بتوصيل نادية إلى المنزل لتستكمل لها سمية مابدأته كما اتفقت معها وهم يغادرون دمياط…جلست مع لبنى ونورا أمام سمية التي كانت تبتسم وهي تقول متعجبة من إلحاح نورا:
– انتي محسساني إني باحكيلك حدوتة قبل النوم كده ليه ?

– عشان خاطري بقى يا خالتو كملي…أنا عايزة اعرف جدي حصله إيه هو وعمي عزت وليه سيبنا دمياط وجينا هنا مع إن أنا عن نفسي بحب دمياط اكتر

– حاضر يا حبيبتي حاكملك…شوفي يا ستي… عمك عزت الله يرحمه قالي ان صبحي لما جدك طرده من الشغل وهو ماشي عزت سمعه وهو بيدعي عليه إن ربنا يحرمه من ماله اللي مستقوي بيه على خلق الله…وده اللي حصل فعلا وكان السبب في م*وت جدك … جدك قبل ما يم*وت …اتخانق مع واحد من تجار الخشب…جدك اتسببله فخسارة كبيرة والراجل جه لجدك عشان يتخانق معاه فجدك طرده وأهانه جامد ادام الناس فالراجل حلف لازم ينتقم منه عشان كده بعت ناس ولعوا فالمعرض والمخزن وللأسف جدك ماكانش مأمن عليهم …فالخسارة كانت كبيرة اوي…جدك قلبه ما استحملش وجاتله أزمة قلبية ومات بسببها…بعدها عمك عزت كان عايز هو وصفوت يحط إيدهم في إيدين بعض ويحاولوا يعوضوا اللي راح…لكن أبوكي رفض وقاله إنه مش عايز أي حاجة من ناحية جدك بعد ماجدك اعترفله وهو بيم*وت باللي عمله مع فردوس ومعاه…وكان عايز يدور على شغل فأي شركة ولا حتى معرض…لكن الله يرحمها صفية رفضت وادتله نصيبها في ميراث أبويا الله يرحمه وهو ده اللي ابتدى بيه…لكنه خدهم منها على سبيل السلف ولما ربنا فتح عليه ردهم لصفية اصله ماكانش عايز صفية يبقالها فضل عليه …والفلوس دي موجودة دلوقتي فالبنك بإسمك يا نورا … أما عزت بقى سمع كلام عمك فاضل جوز عمتك ألفت اللي أقنعه ان البورصة هيا أحسن طريقة يعوضوا بيها الخساير الكبيرة اللي حصلت …وان مكسبها سريع…عمك فاضل الله يرحمه كان طيب اوي واحمد ابنه هو اكتر واحد بيفكرني بيه فطيبته وحنيته وشهامته…المهم عمك عزت حط القرشين اللي كانوا في البنك على ورثي من أبويا اللي أنا اديتهوله وعمتك ألفت باعت نصيبها في البيت …وضاربوا بيهم في البورصة …لكن للأسف خسروهم هما كمان والحالة اتأزمت أكتر..