وصفة صفية بقلم منال ام ابراهيم مرجان ج1

وكأن سؤال نورا أعاد على مسامعها كلمات احمد … فانخرطت في البكاء مجددا ….ضمتها نورا إليها ووضعت رأسها على صدرها وربتت على كتفها قائلة بحنو:
– طيب إهدي بس وفهميني إيه اللي حصل

– لبنى من بين دموعها: طلع بيحب يا نورا…طلع بيحب واحدة غيري

– هو مين ده يا لبنى…احمد

– حيكون مين يعني غيره

– طيب وانتي عرفتي منين

– سمعته وهو بيتكلم مع علي وبيقوله كده

– وماعرفتيش مين هيا?

– لأ مارضيش يقول لعلي…قاله مش وقته دلوقتي

حاولت نورا تهدئتها فقالت بجدية :
– معلش يا حبيبتي…اكيد لو ليكي نصيب فيه حتتجوزيه ولو مالكيش يبقى لازم تعرفي ان ربنا اكيد شايلك حاجة احسن…لازم تعرفي ان قضاء ربنا كله خير

تنهدت لبنى ثم قالت بأسى:مافيش حد احسن من احمد…تفتكري ممكن يكون فيه أمل اننا نكون لبعض

– مين عارف يا حبيبتي بكرة فيه إيه

في بيتي وعلى الكرسي بتاعي …رحمتك يارب

ابتعدت لبنى عن أحضان نورا والتفتا معا إلى قائل هذه العبارة ليجدا ادهم واقفا وهو يضع يديه على صدره …حدثته نورا قائلة بلوم:
– إيه ده يا ابني انت خضتنا…مش حتبطل حركات العيال بتاعتك دي

جلس ادهم علي المقعد المقابل لها ومال بوجهها نحوها قائلا بهمس:
– وابطلها ليه? وحشة?

تراجعت نورا بجسدها للخلف ونظرت إليه بدهشة ممزوجة بالحيرة وقالت بجدية:
– فيه إيه يا ادهم !! ثم انت جيت من الصلاة امتى?

– احنا كلنا جينا على فكرة بس انتوا قاعدين لوحدكوا في الركن البعيد الهادي فما خدتوش بالكوا…وأنا ربنا بعتني في الوقت المناسب عشان امنع الفضيحة عن عيلة الدمياطي

رفعت لبنى يديها بجانب وجهها وقالت بمزاح:
– بريئة يا بيه…أنا ماليش دعوة…هيا اللي قالتلي تعالي فحضني

– نورا: بتبيعيني يا ندلة يا جبانة

-ادهم بمشاغبة: طبعا زعلانة إني قطعت عليكوا المشهد الغرامي بتاعكوا …بس لازم تفهموا ان البيت ده طاهر وحيفضل طول عمره طاهر

-نورا بإبتسامة: طاهر مين …اللي اعرفه ان ده بيت جدي …وجدي كان اسمه حامد مش طاهر

-ادهم للبنى: بقولك إيه يا لبنى…ماتدخلي تشوفيهم خلصوا الغدا كده ولا لسه

-لبنى وهي تنهض من مكانها: أنا فعلا كنت داخلة اشوفهم…وانتي يا نورا …مش جاية معايا

-ادهم: لا معلش سيبي نورا عشان أنا عايزها فكلمتين

اعتذرت نورا قائلة:
– معلش يا ادهم …أنا حاروح مع لبنى ولو فيه حاجة خليها لبعد الغدا ان شاءالله