وصفة صفية بقلم منال ام ابراهيم مرجان ج1

اسرعت نادية تجيبها على الفور:
– مش أنا طبعا…أنا ماعنديش خلق للعيال

صوب الجميع نظراتهم تجاه نادية فيما شعرت أميرة بالحرج الشديد فأرادت نورا تدارك الموقف فقامت من مكانها واقتربت من روضة وهي تمد يدها لها قائلة بإبتسامة:
– طبعا مش انتي…هو حد قال إني حاسيب روضة حبيبتي تروح لحد غيري…تعالي يا رورو

قامت أمنية من مكانها وحملت روضة قائلة:
– لا معلش بقى عن إذنكوا…رورو دي حبيبة خالتو …حتفضل معايا أنا وروحي انتي يا ميرو ماتقلقيش عليها

– الفت: طيب يلا بينا بقى نشوف ورانا إيه

انصرف الثلاثة معا متجهين إلي داخل المنزل فيما خرجت نادية لتتمشى بمفردها على الكورنيش … وبقيت كل من أمنية ونورا ولبنى ولمياء

– نورا : انتي أخبارك إيه يا منمن …وأخبار خالد معاكي إيه?

– الحمد لله والله…بجد أنا لو كنت لفيت الدنيا بحالها ماكنتش لقيت زوج يحبني ويحترمني كده زي خالد…ربنا يرزقكوا انتوا التلاته بأزواج زيه كده…عارفين يا بنات لو ماكانش موضوع الحمل ده كنا بقينا اسعد زوجين في الدنيا

– لبنى: هي لسه مامته برضه فاكرة ان المشكلة عند ابنها

– ايوه يا لبنى…وهو ده اللي محسسني بالذنب اكتر…كفاية إنه يرضى يقول على نفسه إن العيب منه هو عشان مامته ما تجرحنيش بكلمة …ماتتصوروش ده كبره في نظري اد إيه …ده غير إنه عمره ما بينلي ان الموضوع فارق معاه …عشان كده نفسي اسعده واجيبله الطفل اللي بيتمناه

نورا: إن شاءالله يا حبيبتي ربنا حيرزقكوا بيه…بس انتي ادعي ربنا واستغفري كتير وعموما انتوا مش بقالكوا كتير متجوزين…ده كل الحكاية تلت سنين…ده فيه ناس بتقعد بالعشرة والعشرين سنة … بقولكوا إيه احنا مش حندخل نصلي ولا إيه?

أمنية: أيوه صحيح…ماتيجوا نصلي كلنا جماعة مع بعض

لمياء: والله فكرة …بس مين اللي حيصلي بينا إمام?

نورا: خالتو سمية…صوتها جميل اوي في القرأن

أمنية: خلاص يلا بينا… بس احنا نسينا نادية

نورا بإرتباك: لا احنا حنصلي ولما نادية ترجع تبقى تصلي لوحدها

وبالفعل دخل الثلاثة إلي الداخل وانضم إليهم كل من ألفت وأميرة وسمية التي قامت بإمامتهم في الصلاة…وبعد أن فرغوا جميعا من أداء صلاتهم عادوا إلى المطبخ لإستكمال عملهم وانضمت إليهم أمنية بعد أن نامت روضة ثم استأذنت لمياء وصعدت إلي شقتهم وخرجت كل من نورا ولبني إلى الحديقة مرة أخرى…لاحظت نورا أن لبنى تبدو في حالة من الشرود فقالت:
– مالك يا لبنى …أنا عايزة اتكلم معاكي من الصبح ومش عارفة وادينا دلوقتي بقينا لوحدنا…عايزة اعرف كنتي بتعيطي ليه