وصفة صفية بقلم منال ام ابراهيم مرجان ج1

– وكل ده وبابا بعيد بيتفرج ومالوش أي دور?

– لا بعد ماظهرت نادية كل حاجة اتغيرت…أبوكي قرر إنه يشتغل ليل ونهار عشان يأمنلها مستقبلها ويعيشها أحسن عيشه…مابقاش مكتفي بالشغل اللي بدأه بفلوس صفية…إنما قرر يقف جنب عزت ويحاولوا يلحقوا الدنيا اللي اتهدت دي…لكن عمك عزت الله يرحمه مالحقش بعد ظهور نادية بأسبوعين عمل حادثة بالعربية ومات وكانت وقتها لميا لسه مولودة عندها يادوب شهرين

عند هذا الحد توقفت سمية عن السرد وتتابعت دموعها في النزول … وشاركها الجميع إلى أن قامت نورا واحتضنتها قائلة :
– بس عشان خاطري…أنا اسفة لو كنت فكرتك …لو مش عايزة تكملي خلاص

– خلاص يا حبيبتي أنا تقريبا خلصت …بعد كده أبوكي ربنا فتحها عليه زي ما انتي شايفة وبقى عنده معرضين وورش في دمياط غير الشركة والفيلا اللي هنا والشاليه بتاع مطروح…ربنا يباركله فماله … هو بصراحة طول عمره ذكي وطموح الحق يتقال…وبعد م*وت عزت أبوكي اخد علي يشتغل معاه فالمعرض وقتها كان عنده تسع سنين…الشهادة لله كان بيعامله اكتر مايكون إبنه ولما خلص الثانوية العامة وجاب مجموع يدخله كلية الهندسة هو واحمد…ابوكي اتكفل بكل مصاريفهم واجرلهم شقة هنا في القاهرة يقعدوا فيها طول الخمس سنين بتوع الدراسة وكان معاهم خالد جوز أمنية…ده غير مصاريف لبني ولميا هما كمان…ونفس اللي عمله معايا عمله مع الفت وولادها…وإن جيتي للحق هيا دي الحاجة اللي بتغفر لأبوكي عندي اللي عمله مع صفية .

تنهدت نورا قائلة بتأثر:
– بابا ده تحسي إنه كوكتيل غريب اوي من المشاعر …ماتقدريش تعرفي ه حنين ولاقاسي ولا ظالم ولا لأ…ازاي يقدر يحب طنط فردوس الحب ده كله…وفنفس الوقت يقدر يكره ماما للدرجةدي

– أبوكي حنين بس بعيد عن أي حاجة تخص صفية…أو يمكن عشان كان بيحب فردوس اوي زي عمك ماقالي فكره أي حد كان السبب من وجهة نظره فبعده عنها…ويمكن شايل جميل عزت معاه…لما وقف جنبه فموضوع فردوس وماخافش من غضب ابوه عليه لو عرف بإنه كان شاهد ع الجواز.

– طيب فاضل أخر حاجة بقى…عايزة اعرف ليه سيبنا دمياط وجينا هنا?

– أبوكي يا حبيبتي هو اللي كان عايز كده…كان عايز يبعد عن دمياط وذكرياته فيها …وكمان عشان حاجة مهمة انتي نسياها …انتي ناسية ان فردوس الله يرحمها مدفونة هنا…عشان كده قرر يفتح الشركة اللي حيصدر عن طريقها شغل الورش بتاعته للخارج هنا فالقاهرة…والكلام ده كان فنفس السنة اللي ماتت فيها صفية واللي اتخرج فيها علي واحمد من الجامعة…أبوكي اشترى الفيلا وعمل الشركة وعرض عليا إني اجيب الولاد ونيجي نعيش جنبه هنا وهو حيجيبلنا شقة نعيش فيها…كان عايز يفضل واخد باله من ولاد أخوه ومطمن عليهم جنبه…واخد علي يشتغل معاه فيها …واطمن على الشغل اللي فدمياط بعد ماسابه لأحمد ولما ادهم خلص كليته اشتغل معاه…وأنا بعد م*وت صفية أختي ومن قبلها عزت وقبل منهم أبويا وأمي مابقاش ليا حد فدمياط استنى عشانه …فوافقت وجيت عشت فالشقة دى بعد ماصممت اتنازل لأبوكي عن شقتنا فبيت العيلة …وآهو بقالنا هنا خمس سنين…وأخر كل شهر بنروح دمياط نزور عمتك ألفت وأبوكي يراجع الحسابات مع ولاد عمتك …ونزور قبور حبايبنا اللي هناك ونقرالهم الفاتحة لحد ما ربنا يأذن ويجمعنا بيهم على خير ان شاءالله