وصفة صفية بقلم منال ام ابراهيم مرجان ج1

عند هذا الحد توقف عزت عن السرد وقد بدا عليه التأثر من أجل شقيقه …ولم تكن سمية بأفضل منه حالا…بعد لحظات من الصمت بينهما قطعتها سمية قائلة:
– طيب وانت جايب نادية هنا دلوقتي ليه…صفوت ليه ما اخدهاش معاه فوق عند صفية ?

– صفوت قالي اخليها هنا لحد ما يشرح الموضوع لصفية ويفهمها على الوضع الجديد ويشوف حتوافق عليه ولا لأ

– وهو أخوك عنده شك ان صفية حتوافق

– بجد يا سمية…يعني انتي متأكدة ان صفية حتوافق

– يظهر ان أخوك كل ده ومايعرفش صفية…دي ما حتصدق تلاقي حاجة زي دي عشان تتقرب بيها من صفوت…يمكن لما توافق تربيله بنته يحن عليها ويغير شوية من معاملته ليها…اللي أنا دلوقتي بس فهمت سببها إيه

“باك”

– وفعلا صفية ماخيبتش ظني وافقت علطول ورحبت اوي بالموضوع …وعاملتها احسن من بنتها…وربتها لحد مابقى عندها 17سنة لحد ما ماتت الله يرحمها

تنهدت نورا قائلة بأسى:
– فعلا …أنا فاكرة واحنا صغيرين لما كانت نادية تتسلط على لعبة من لعبي …كانت ماما تقولي سيبيهالها وأنا اجيبلك واحدة تانية…ولما ماما تجيبلي بدالها نادية كانت تصمم برضه انها تاخدها

تدخلت لمياء قائلة:
– ده من الواضح بقى انها طول عمرها على كده أنانية ومش بتفكر غير في نفسها وبس

– عشان خاطري يا لميا ماتقوليش عليها كده …ماتنسيش انها أختي مهما حصل

ربتت سمية على يدها قائلة بإبتسامة:
– ربنا يكملك بعقلك يا حبيبتي…عارفة أمك الله يرحمها لما كنت أعاتبها في الحكاية دي…كانت تقولي معلش هيا مهما كان يتيمة ماينفعش نييجي عليها…لكن نورا أنا موجودة وأقدر أعوضها…وياريت ده كله فرق مع أبوكي…بالعكس معاملته من يومها بقت أسوأ من الأول

– لبنى بدهشة: ليه بقى يا ماما?

– عمك كان مأثر فيه اوي ان اليوم اللي يلاقي فيه فردوس يكون هو نفسه اليوم اللي يتحرم فيه منها للأبد …كان بيعتبر المسئول عن ده هما اتنين…جدك الله يرحمه وصفية …جدك وقتها كان مات…ماكانش فاضل ادامه غير صفية…وعلى اد حبه لفردوس على اد ماكان بينتقم من صفية على حاجة عمر ماكان ليها ذنب فيها…كان شايف ان جدك عمل كل ده بسسب صفية…قال يعني لو ماكانتش صفية موجودة ماكانش جدك حيدور على واحدة غيرها يجوزها لأبوكي…ولا كان ممكن ساعتها يوافق يجوز إبنه لبنت واحد بيشتغل عنده…عموما جدك الله يرحمه اخد عقابه قبل ما يمو*ت وصفية أبوكي فضل يذل فيها لحد ماجاتلها جلطة وماتت الله يرحمها بقى