وصفة صفية بقلم منال ام ابراهيم مرجان ج1

عند هذا الحد لم تستطع سمية أن تقاوم نغزات الدموع في عينيها…فسمحت لها بالنزول وتركتها تنساب وكأنها أمطار هطلت في ليلة شتاء قاسية …شاركتها نورا هي الأخري لبرهة ثم مالبثت أن مسحت دموعها قائلة بتأثر:
– عارفة يا خالتو…أنا دلوقتي عرفت ان بابا هو كمان مظلوم في الحكاية دي…بابا وماما وطنط فردوس ونادية وأنا كلنا كنا ضحايا طمع وأنانية جدي الله يرحمه بقى…هو مات وسابنا كلنا ندفع التمن من بعده…عارفة أنا بعد كده مش حازعل من بابا ابدا ومهما يعمل فيا برضه حاستحمل…لكن قوليلي بقى…ازاي جدي ربنا عاقبه زي ما بتقولي…وإيه حكاية الأزمة اللي وقفتي فيها مع عمي عزت دي…وكمان عايزة اعرف احنا ليه سيبنا دمياط بعد وفاة ماما الله يرحمها وجينا القاهرة

نهضت سمية من مكانها قائلة:
– لا كفاية كده اوي النهاردة…اوعدك اننا لينا قعدة تانية مع بعض نكمل فيها…لكن دلوقتي تروحي تكلمي باباكي وتستأذنيه عشان تباتي هنا…وتدخلي مع لبنى دلوقتي تشوفوا مذاكرتكوا

– نورا بإذعان: انت تؤمر يا جميل
*********************************************

في الصباح استيقظت كل من نورا ولبنى ولمياء واستعدوا للذهاب للجامعة…تناولوا طعام الإفطار مع سمية التي وجهت حديثها لهم قائلة:
-اعملوا حسابكوا اننا حنسافر دمياط النهاردة اخر النهار إن شاءالله…معلش بقى يا نورا احنا حنغلس عليكي عشان تاخدينا معاكي في عربيتك واحنا مسافرين عشان علي مش هنا زي ما انتي عارفة وباباكي هو اللي قاله كده.

قامت نورا من مكانها واتجهت إلى حيث تجلس سمية وطوقت عنقها بذراعيها ثم قبلت وجنتها قائلة بمرح:
– يا خبر يا خالتو…ده العربية وصاحبة العربية كمان تحت أمرك…ده أنا لو كنت اعرف من زمان كنت فرشت العربية ورد عشان خاطر عيونك

ربتت سمية على ذراعها وقالت بحنو:
– ربنا ما يحرمنيش منك يا حبيبتي

نظرت إليها لبنى بطرف عينها وقالت في مشاغبة:
– يا سلام على البكش…أيوه يا ست نورا…ما انتي لازم تعملي كده مع حماتك المستقبلية

توردت وجنتاها خجلا وهي تجيب لبنى قائلة بحرج:
– إيه اللي بتقوليه ده بس يا لبنى?

اسرعت سمية تجيبها على الفور قائلة بجدية:
– سيبيها يا حبيبتي…مالك مكسوفة كده ليه…ده أنا منايا إني اشوفك انتي وعلي وانتوا قاعدين جنب بعض في الكوشة…ياه نفسي اعيش لما أشوف اليوم ده وافرح بيكوا وانفذ وصية صفية اختي الله يرحمها