صراع الذئاب بقلم ولاء رفعت ج1
_________________________
_ في منزل الشيخ سالم ….
_ أهدي ياحاج فتحي وإن شاء الله خير … أنا مقدر الي أنت فيه وحقك تعمل الي أنت عايزه … لكن هو عمل كده ومش ف وعيه يعني تحت تأثير الهباب الي بيتعطاه ده …. قالها سالم الذي أجمع كلا من والد شيماء وعبدالله الذي يجلس ف خجل وبعض رجال كبار الحارة
فتحي : يعني أنتي ترضي ياشيخ سالم يجي كلب زي ده وانت مش موجود ويتهجم ع اهل بيتك !!! ماتقولو حاجه يا رجالة
_ لاء طبعا ميصحش … بس أنت غلطان يا أبو شيماء أنك خليت بنتك تتخطب لعيل نطع زي ده … قالها عطا صاحب محل الجزارة
نهض عبدالله وزمجر بصوت غاضب : جري أي ياعم عطا هو أنا عشان ساكت هتغلط فيا أنا ممكن أقل منك أدام الرجاله ولايهمني
نهض عطا وبنبرة غاضبة قال : أخرس كتك قطع لسانك لولا إن إحنا ف بيت الشيخ سالم كنت علقتك من عرقوبك زي الدبيحة
_ قعد يا عبدالله يابني وعيب تكلم الي أكبر منك كده … وأهدي يا حاج عطا إحنا جايين نصالح مش نولعها …قالها سالم وهو يشير إليهما بالجلوس
فتحي : شوفت غلطان وبيبجح إزاي!!
زفر سالم وقال : ماتصلو ع النبي ياجماعة
_ عليه أفضل الصلاة والسلام …. رددها الجميع
سالم : أنا مرضتش أعمل قعدة الصلح دي عندك ياحاج فتحي وخليتها عندي وقبل ماتتفض لازم يكون كل طرف فيكو مرضي .
عبدالله : والله ياشيخ سالم أنا كل مشكلتي أن حاج فتحي مش راضي نتجوز ف الأوضة الي فوق السطوح الي عايش فيها .. اي نعم هي ع الأد بس بشوية توضيبات هخليها أحسن من شقة سوبر لوكس … لكن هو رافض وأنا وبنته خللنا ف الخطوبة دي
فتحي : يعني عايز البت تخرج من شقة أبوها ع أوضة فوق السطوح !!! ليه إن شاء الله
سالم : أستني بس ياحاج فتحي … قالها ثم نظر إلي عبدالله وقال : أنت ف مقدرتك أي ياعبدالله ؟؟
حك رأسه من الخلف وقال : بصراحة كل الي معايا يدوب أجيب بيهم أوضة نوم ع الأد وأنتريه محندء (صغير) والباقي أوضب بيه الأوضة دهانات وكهربا
فتحي : وأنا مش موافق حتي لو جبت شقة أنا مأمنش ع بنتي معاك تاني
تدخل إحدي الحاضرين وقال : ياحاج فتحي إحنا عايشين ف حارة وزمان كل بيت فيها عرف الي حصل يعني لو فسخت خطوبة بنتك أنت عارف الناس مابتصدق والكلام هيتطور وبنتك سمعتها هتبوظ
نهض فتحي من مقعده وصاح بصوت جهوري : قطع لسان الي يجيب سيرة بنتي بكلمة كده ولا كده .. أنا بنتي ست البنات وأشرف من الشرف … بس الواد ده خلاص يشوفوله حد غيرنا
