من انا بقلم حليمة عدادي ج3
-إيه الجمال ده يا نانوسي؟ كده مش هسمح لك تخرج يا أستاذ!
ضحك “يونس” بخفة، كلماتها كانت موسيقى تدغدغ مشاعره. جذبها إلى حضنه بقوة، كأنها جزء منه، وكأن هذا هو المكان الطبيعي لها. وضعت رأسها على كتفه، ثم رفعت رأسها لتلتقي عيونهم. قال لها في هدوء:
-الجمال جمال عيونك إللي سحرتني. وليه مش مسموح أخرج يا توته؟
زمت “تقى” شفتيها وضيقت عينيها بشكل طفولي، ثم قالت بعناد:
-علشان الكل هيبصلك، وأنت عارف لو بصتلك أي ست مش مسؤولة عن إللي هعمله فيها يا نانوسي.
ابتسم “يونس” بحب وقال:
-قلبي وعقلي وكل حاجة في حياتي ملك توته، ومستحيل أفكر في حد غير توته.
ختم كلماته بقبلة كلها حنية على رأسها، ثم أبعدها عنه قليلًا وقال :
-“تقى”، أنا هسافر، خلي بالك من نفسك، وبلاش عياط أو زعل، ماشي يا عيوني؟
نظرت إليه في صمت للحظات، ثم قالت بصوت هادئ، وقد شعرت بالحزن يتسلل إليها:
-بس أنا هروح معاك يا “يونس” علشان مش هقدر أبقى مطمئنة عليك لو مكنتش معاك.
أمسك بوجنتيها بين راحتيه وهو ينظر في عينيها بعمق، ثم قال بجدية:
-بصي يا توته، ده موضوع صعب. إحنا مش عارفين هنتعرض لإيه هناك، وكده ده ممكن يكون خطر عليك. خلينا نعرف الأول إذا كانت لسه عايشة، وبعدها نبقى نفكر.
عبست ملامحها وأخفضت رأسها، تنظر للأرض وكأنها تتصارع مع مشاعرها، ثم قالت بقلق:
-بس مش هقدر أكون مطمئنة عليك. عايزة أكون جنبك يا “يونس” بص هعد في العربية مش هنزل منها.
ابتسم لها ابتسامة دافئة وقال:
-أنتِ في قلبي يا توته، معايا في كل مكان. كل اللي محتاجه دلوقتي هو دعواتك.
رفعت رأسها مجددًا، وابتسمت ابتسامة هادئة مصحوبة بتنهيدة، ثم قالت:
–
-هدعيلك يا قلبي، ترجع لي بالسلامة وتحقق كل إللي في قلبك. يلا، علشان تفطر قبل ما تسافر.
أمسك يدها، ثم تقدما إلى الخارج. كان الجميع مجتمعين حول المائدة. ألقى عليهم تحية الصباح، ثم جلس بجانب “تقى”.
بدأو الفطور في هدوء تام حتى انتهوا، ثم نهض “حسام” و”مؤمن” للذهاب إلى المطعم، بينما تجهز “أحمد” و”يونس” للسفر. تقدم “حسام” صوب شقيقه، ثم ربت على كتفه وقال:
-هترجع بالبشرى، هترجع بالخبر الحلو باذن الله ، وتلاقي اللي كنت رايح علشانه…. ربنا كبير يا حبيب أخوك
لم يكن رد “يونس” سوى ابتسامة، بينما كانت عيناه تراقبان تلك التي تقف بجانبه حزينة، حتى وإن حاولت إخفاء مشاعرها، كان يراها بوضوح في عينيها.
